Лімонны
На адзін гарнец спірту даюць паўгарца мяккай вады, жоўтых лімонных лупін: калі свежыя
— фунт, калі сухія — паўфунта, карыцы паўлота. Трымаюць два тыдні ў цяпле, потым
сцэджваюць, запраўляюць і фільтруюць, як ужо гаварылася вышэй.
Льга таксама ўліць у лікёр алею і зрабіць колер жоўтым шафранам (глядзі раздзел Аб
падфарбоўванні гарэлак).
Апельсінавы
Запраўляюць накшталт лімоннага.
Блакітны лікёр з крываўнікам
Гатуецца такім жа чынам, як і гарэлка з крываўнікам ( глядзі вышэй), толькі цукру бяруць у
чатыры разы больш, чым для гарэлкі.
Кававы
Глядзі вышэй гарэлку з такой жа назвай. Пры запраўцы лікёру больш даецца цукру.
Гваздзіковы
Белы запраўляюць алеем гэтак жа, як гваздзіковую гарэлку ( глядзі вышэй), чырвоны
наступным чынам. Свежыя пялёсткі гваздзікі малінавага колеру заліваюць спіртам. Калі
пастаяць на сонцы некалькі дзён і пачнуць жаўцець, спірт зліваюць на свежыя пялёсткі.
Праз некалькі дзён яго сцэджваюць і запраўляюць лікёр звычайным спосабам. Як пах
слабы, дабаўляюць гваздзіковы алей ці на гарнец спірту усыпаюць чвэрць лота
непатоўчанай, але прамытай гваздзікі і з ёй зноў настойваюць дзён дзесяць. Потым
сцэджваюць і, запраўляючы, сочаць за колерам. Калі ён яшчэ не будзе прыгожым і чыста
малінавым, дык дадаюць колькі кропель сернай кіслаты, як тое гаварылася пра лікё з
ружай.
Малінавы
Ягады адціскаюць, працэджваюць праз палатно, а як сцячэ сок адмерваюць столькі
шклянак цукру, колькі атрымалася соку. Сіроп кіпяцяць тройчы, кожны раз знімаючы
пенку, а ў астуджаны наліваюць спірт. Колькі было соку, на столькі ж менш льюць вады, бо сок заменіць яе і аслабіць крэпасць спірту. Колькасць цукру такая ж, як і для іншых
лікёраў.
Сунічны
У бутлю кладуць трохі перабраных прыгожых суніц і напаўняюць яе спіртам. Два дні
няхай стаіць у цёплым месцы ў цяні. Потым спірт зліваюць* і разводзяць яго вадой, у якой
дагэтуль стаялі суніцы два ці тры дні. Вады бяруць не больш чым адну кварту на гарнец
спірту, бо ён ужо разведзены тым сокам, што пусцілі ягады.
__________
* Ягады, што застануцца, льга заліць вадой, якая, выцягнуўшы з іх крэпасць спірту, будзе
прыдатная для запраўкі воцату.
Вішнёвая наліўка
Заліваюць вішні спіртам так, каб ён добра пакрыў ягады, дадаўшы на кожны гарнец яго
шэсць гваздзік і лот карыцы. Усё трымаюць на сонцы цэлы месяц. Калі вішні пажаўцеюць, спірт зліваюць і запраўляюць яго чатырма фунтамі цукру на гарнец вадкасці, як лікёр.
Альбо бяруць толькі адзін фунт цукру на гарнец наліўкі, робяць з яе салодкую гарэлку і
фільтруюць праз суконны мяшэчак ці прамакальную паперу.
Да спірту, аслабленага ўжо тым, што ён усмактаў у сябе сок з ягад, дабаўляюць столькі
вады, колькі патрэбна для прыгатавання сіропу.
Іншая наліўка з садавіны