Сядзеў на кукiшках, гайдаўся,
Цiшком шчыкаючыся з братам.
Кастусь сядзеў мiж iм i татам;
Ён да яды не так быў падак,
Бо ўжо намазаўся аладак,
Але сядзеў i мяў аладку
Ды штурхаў бацьку пад лапатку.
Уладзiк быў у дзядзькi збоку...
Дзяцей, як тых снапкоў на току!
Сямейка, праўда, немалая:
Чатыры хлопцы, тры дзяўчацi
Ды бацька з дзядзькам, трэцця мацi;
I кожны месца сваё мае.
Тым часам мацi даставала
Чыгунчык з печы, лыжку брала
I верашчаку налiвала.
А за сталом на верашчаку
Падгатаўлялi ўжо атаку,
На гэта хлопцы былi хваты,
Аладкi кроiлi ў квадраты
(Хоць геаметрыi не зналi)
I на вiдэльцы iх чаплялi,
Як бы на тычкi тыя вешкi,
Каб не адстаць, не мець замешкi
У часе дружнае яды.
Чуць мiска ткнулася сюды,
Дык у яе, як па прыказу,
Вiдэльцаў з восем лезе зразу.
Гаворка моўкне, смех сцiхае:
Цяпер мiнуцiна другая,
Бо ўсiх займае мiска стравы;
Другiя моманты, праявы,
Усе пафукваюць ды студзяць
I верашчаку тую вудзяць
I толькi чаўкаюць губамi
Ды зрэдку скрыгаюць зубамi,
Як бы на бераг тыя хвалi
У часе ветру наступалi.
Малыя - Гэля, Юзiк, Ганна
Асобна елi пастаянна.
Парадку дзецi не трымалi,
I iх нiколi не сцiскалi,
Абы насоў не разбiвалi;
Так, Юзiк пальцам поркаў страву
I верашчакай мазаў лаву,
Але тут сёстры сердавалi
I залаб Юзiка цягалi.
Тады iх згода прападала,
Мiж iмi бойка вынiкала.