Абвінаваць мяне ва ўсіх грахах,
Калі такое маеш ты жаданне, -
Што станавіўся на ганебны шлях,
Не праслаўляў я нашага кахання;
Што далучаўся да такіх сяброў,
Якія з добрым словам незнаёмы,
І што па волі чатырох вятроў
На ветразях усіх ішоў ад дому.
Каб грэх мой цяжкі стаў яшчэ цяжэй,
Маю сваволю кінь на тыя шалі.
Глянь строгім поглядам тваіх вачэй,
Абы на смерць мяне не пакаралі.
Пераканацца толькі меў на мэце,
Якую моц каханне мае ў свеце.