Сонэто 150
Катхы́р, мри бизорья́кири, да зор,
Соб дро миро́ ило́ тэ раинэ́с?
Соб тэ патя́в, мэк хохавэ́са, хор,
Тэ совлаха́в, хай, сы кало́ — дывэ́с.
Сыр парувэ́са ту саро́ кирнэ́с?
Зор биладжя́кири тыри́ катхы́р,
Со дрэ мири́ годы́ ту сыкавэ́с
О кучипэ́н сарэ́ндыр гожэды́р?
Кон тут сыклякирдя́, соб тэ барьёл
Ваш тукэ мрэ холя́са камлыпэ́н?
Сарэ́ раки́рна, хай, ничи́ на мо́л,
Ками́ манга́ва, на́ шун ту ваврэ́н.
Сыр да барьякирэ́л тро кирныпэ́н,
Буты́р сарэ́ндыр мо́л мро камлыпэ́н.