Сонэто 151
О камлыпэ́н — тэрно́, соб тэ ґалёл
Э ладж, мэк сы, ґалёв, чяй лэ́скири.
Мирэ́ доша́ (ман тэ кошэ́с на мо́л) -
Шукарипэ́н тыро́, мри гудлори́.
Ту хохавэ́сас, тэ адя́кэ ж мэ
Мро ди́ мирэ́ масэ́са хохава́вас,
Мас хохадя́ оди́ нахасимэ́,
Тэ мэ дрэ дылынэ́ндэ ачява́вас.
Шуна́в тро лав, ґаздэ́лпэ ладж мири́,
Тэрды́ учес, прэ тутэ сыкавэ́ла,
Сыс пхутькирды́ пашэ раны́ бари́,
Тэ традыны́ аври́ — тэлэ́ пэрэ́ла.
Кон сыс дро камлыпэ́н тэла́л-упра́л,
Ёв ґалыя́ миштэ́с, сыр ладж тэ хал.