Сонэто 023
Сыр о актёро дылыно́ дрэ дар
Прэ сцэ́на выпэрэ́ла патриня́тыр,
Сыр холямо́ — хачёла сыр ванга́р
Тэ нашавэ́ла э годы холя́тыр.
Адя́кэ ж мэ дара́ва: паруды́!
Забистырдём татэ́ лава́ хула́скрэ,
Ґалёв, э зор илэ́стыр нашады́,
Киркипэна́ ман ха́на камлыпна́скрэ.
Мэк мрэ лыла́ годя́са ракирэ́на,
Со про ило́, ёнэ́ сы чибалэ́;
Соб ту тэ плэскирэ́с, ёнэ́ пхэнэ́на, –
На чиб мири́, ада лава́ чиндлэ́.
Дыкх прэ лава́: ило́ лэн бичявэ́ла,
Коли́ камэ́с, тыро́ ило́ шунэ́ла.