Сонэто 035
Мэк туга! Со кэрдя́н, забистэрдя́м.
Роза́кэ — пусадя́, панескэ — мэл;
Дрэ тучи гарадён о чён, о кхам,
Дрэ лулуди́ жужы́ — кирмо́ дживэ́л.
Дро грэ́хи сам. Буты́р — мэ кокоро́,
Коли́ парнякира́в три дош ваврэ́нца:
Сом кирнэды́р, сыр грэ́хо на́баро
Мэ простина́ва да барэ́ лавэ́нца.
Мэк мэ ко сэ́ндо тут и притырда́в,
Марэ́лпэ мрэ холя́са камлыпэ́н:
Прэ ма́ндэ ла́ва грэ́хи тэ чюрда́в,
Пал тутэ сом дро розкэдэибэ́н.
Мэ на кэра́ва тукэ пфуй ничи́,
Мэк обчёрдя́н ман, мри чёрны́ лачи́.