Сонэто 052
Сыр барвало́, конэ́скиро клыды́н,
Коли́ ками́, ко кучипэ́н мэкэ́ла,
На чя́стэс джя́ла тэ дыкхэ́л, со сын,
Ёв дрэ якха́ э бокх барьякирэ́ла…
О свэ́нки гудлэды́р, сыр нанэ́ бут,
Дуй вэ́сны тэ явэ́н дро бэрш нашты́,
Сыр лачё бар, дыкха́в начястэс тут,
Сарэ́ндыр кучеды́р дрэ ангрусты́.
Тут рикирэ́ла, сыр дрэ тыкнори́,
Э судьба, сыр куч и́дя, гарадя́,
На чястэс ма́нгэ дэ́ла бахтори́,
Соб тэ дыкха́в тут го́жэс откэрдя́.
Ракх тут Дэвэ́л, пал тыро́ гудлыпэ́н,
Сыр битыро́ — пал дужакирибэ́н.