Сонэто 056
Камлы́, нэвэ́ зорья́са ман облэ́,
Буты́р бокха́тыр екх ваврэ́с кама́са,
Сам камлыпна́са дадывэ́с чялэ́,
Нэ атася́ бокха́тыр, хай, мэра́са.
Ададывэ́с тыри́ бокх камады́
Дрэ трэ шука́р якха́, хай, мурдэя́,
Нэ атася́ палэ́ сы хачкирды́,
Бут на́ чярав ла, со́бы рисия́.
Сыр бут бэрша́, екх битыро́ дывэ́с,
Сыр мо́рё машкир брэ́ги надыкхнэ́,
Про брэ́го коли ма́н дужакирэ́с,
Сыр удыкха́спэ го́жэс дуйджинэ́!
Сыр зы́ма битыро́, нэ о лына́й
Трин мо́лы татэды́р, сыр ту ада́й.