Сонэто 060
Сыр рат-дывэ́с баро́ паны́ пхурдэ́ла,
Адя́кэ амарэ́ минуты джя́на,
Тэ екх ваврэ́с про штэ́то парувэ́ла,
Бэрша́ ж саро́, со сы про свэ́то, ха́на.
Барьёла чён тэрно́ про болыбэ́н,
Собы екх рат коро́на тэ лыджя́л,
Сыг нашавэ́ла пэ́скро пхэрдыпэ́н,
Тэ ды́кх: банго́, пхуро́ ко гро́бо джял.
Бэрша́ барьякирэ́на тэрныпэ́н,
Палэ́ — чювэ́на бры́нды про чека́т,
Бэрша́ э бандины́[49] дро васт ґаздэ́н,
На чяляки́рла лэн джидэ́нгро рат.
Тро гожыпэ́н дрэ мри гилы́ шарав,
Соб ангил васт бэршэ́нгро тэ ракха́в.
scythe