Сонэто 088
Коли́, мро Кхам, ваш ма́нгэ замурдёса,
Чюрдэ́са про сабэ́н миро́ ило́,
Подрикира́ва тут мэ сарэ дёса,
Мэк тэ явэ́л чячюныпэ́н кошло́.
Мро кирныпэ́н фэды́р ваврэ́ндыр мэ
Ангил сарэ якхэ́ндэ откэра́ва,
Ваш тукэ мрэ доша́ гарадымэ́
Прэ тыри́ бари́ сла́ва парува́ва:
Ваш пэ́скэ ачява́ва екхоро́:
Миро́ ило́ камло́ мэ хаськира́ва,
Коли́ дукх дэ́ла васт мро пэ́скиро,
Со дорэстя́н — дуй мо́лы дорэса́ва.
Ками́ тут, ваш тыри́ холы́ — нанго́,
Соб тэ явэ́с ту чячюны́ — банго́.